Regla i kondishon pa hasi petishon

Regla tokante e formulario di petishon i e dokumentonan ku mester entregá huntu kuné

Pa entregá bo petishon, bo mester usa nos formulario di petishon digital. E formulario ta konsistí di 3 página.

Promé ku bo kuminsá yena e formulario, lesa tur e kondishonnan ku mester kumpli kuné pa bini na remarke.
Nan ta aparesé mas abou riba e página akí. Ta importante pa lesa nan ku atenshon.

Kòrda manda TUR e dokumentonan ku nos tin mester pa por traha riba bo petishon.
Si nos keda sin risibí unu òf mas di e dokumentonan nesesario, nos no por atendé bo petishon.

Nos mester risibí:

  1. E statütnan di e organisashon ku ta hasi e petishon.
  2. Un ekstrakto di Kámara di Komèrsio (no mas ku 6 luna bieu).
  3. E organisashon su plan di aktividat pa e aña ku nos ta aden.
  4. E organisashon su presupuesto pa e aña ku nos ta aden.
  5. Su kuentanan anual (balans i resultatenrekening) i informe anual di e aña ku a kaba di pasa.
  6. Un deskripshon bon kla di e proyekto. Esaki mester inkluí e planifikashon (projectplanning).
  7. Un presupuesto detayá di e gastunan di proyekto ku boso ta deseá di kubri mediante e donashon ku boso ta pidiendo.
  8. Un plan ku ta mustra kon ta bai kubri tur e gastunan di e proyekto (dekkingsplan).
  9. Oferta bálido pa tur produkto i servisio ku e organisashon ta bai kumpra òf kontratá pa e proyekto.
Petishon di Donashon pa Organisashon
Petishon di Donashon pa Skol

Kondishon pa bini na remarke

Lesa tur e siguiente kondishonnan bon promé ku bo entregá bo petishon pa un donashon.

  1. E organisashon ku ta hasi e petishon mester ta sea un skol, un fundashon òf un asosiashon sin fin di lukro (ku no ta traha pa ganashi). E mester ta establesí na Kòrsou i mester ta traha prinsipalmente ku boluntario. E boluntarionan no por ta fundashon òf instituto ku gobièrnu a lanta òf ku ta risibí supsidio regular for di gobièrnu.
  2. E organisashon ku ta hasi e petishon mester tin sea 2 aña òf mas ta operá di akuerdo ku e meta fihá den su statütnan.
  3. Instituto komersial i instituto ku gobièrnu a lanta òf ku ta risibí supsidio regular for di gobièrnu no por hasi petishon.
  4. Algun di e gruponan ku normalmente no ta bini na remarke pa risibí donashon ta partido polítiko, negoshi, grupo di amigu, grupo di karnaval, medionan di komunikashon, universidat, organismo di gobièrnu i instituto ku gobièrnu a lanta òf ku gobièrnu ta manehá.
  5. E organisashon ku ta hasi e petishon mester tin un direktiva ku ta konsistí di tres persona òf mas i e personanan akí no por ta famia di otro.
    Esnan ku ta hasi e petishon mester deklará bon kla i segun bèrdat ku e miembronan di e direktiva no ta famia (di sanger òf kasá) di otro. Nan no por ta famia di promé ni di dos grado (mayor/yu, ruman, kuñá/sua, primu/prima/tio/tanta).
  6. Nos no ta hasi donashon na persona individual.
  7. E petishon mester ta pa un proyekto i nada otro. Ta papia di un ‘proyekto’ ora ta trata di un aktividat ku tin, entre otro: un fecha fihá pa e kuminsá i un fecha fihá pa e finalisá, un meta bon definí, un grupo meta bon definí, un presupuesto, un ‘dekkingsplan’ kompleto, un deskripshon kla di e manera ku lo evaluá resultado di e proyekto i di e manera ku lo raportá na final tokante kon ehekushon di e proyekto a bai.
  8. E organisashon ku ta hasi e petishon mester por proba ku e ta disponé di e personal di maneho i e boluntarionan nesesario pa por ehekutá e proyekto ku éksito.
  9. E máksimo ku por pidi komo donashon ta NAf. 10.000.
    En todo kaso, un organisashon ku hasi un petishon no por risibí mas ku NAf. 10.000 denter di un periodo di 12 luna.
  10. Un di e siguiente metanan mester ta e proyekto su meta direkto: traha ku hóben i mucha en general, i en partikular ku hóben i mucha ku tin problema di komportashon òf ku siñamentu, duna sosten na hóben i mucha (te 21 aña) ku ta vulnerabel den sentido sosial, duna sosten finansiero na hóben i mucha (te 21 aña) di mayor di ménos rekurso pa nan por partisipá na aktividat deportivo òf kultural, traha pa redusí embaraso hubenil i drop-out.
    Otro posibel meta: duna perspektiva na grupo vulnerabel i/òf ménos privilegiá den komunidat, stimulá habitante di bario marginá pa biba mas uní ku otro, kombatimentu di pobresa, kreashon di empleo, duna asistensia na hende malu òf ku tin un desabilidat mental òf físiko, amplia hende su konosementu riba tereno di nutrishon, salú, higiena i medio ambiente, fomentá mas partisipashon den komunidat, kombatí diskriminashon, yuda hende bira mas kapas pa pèrkurá pa nan mes, i redusí desigualdat ekonómiko.
  11. Pa tur trabou, produkto i servisio ku e organisashon ta bai kumpra òf kontratá den kuadro di e proyekto, nos mester por mira oferta bálido. E suministradónan di e produkto- i servisionan ei no por tin niun relashon di famia ku esnan ku ta pidi e oferta.
  12. E fecha pa e proyekto kuminsá no por kai ménos ku kuater siman despues ku nos a risibí tur dokumento nesesario.
  13. Tamaño di e proyekto i e suma di e donashon pidí mester ta rasonabel ora kompará esakinan ku e kantidat di persona den e grupo meta ku e proyekto lo mester yuda.
  14. E organisashon mester finansiá 15% òf mas di e suma total di e proyekto usando su propio fondonan, kontribushon di su miembronan òf fondo di otro fuente.
  15. Nos ta preferá di hasi donashon na proyekto ku ta risibí fondo serka mas ku un organisashon. Esei ta nifiká ku un proyekto ku ta risibí finansiamentu for di otro dunadó di supsidio ademas di SJB tin mas chèns di risibí un donashon serka nos. Naturalmente, aki nos no ta papiando di otro organisashon serka kual boso a pidi donashon, sino ku a bai di akuerdo pa hasi boso un donashon. Pero esei no ke men tampoko ku nan partisipashon mester ta mes haltu ku e suma ku boso ta pidi serka nos.